02 DECEMBER 2013
| |
| Volunteer nurses kailangan ng World Health Organization sa lungsod ng Tacloban |
| |
| (LUNGSOD NG TACLOBAN, Leyte) Kailangang-kailangan ng World Health Organization (WHO) ang 20 boluntaryong nars upang makawaksi sa pagbabakuna sa mga mamamayan ng lungsod na ito na apektado ng bagyong "Yolanda." Sa pulong ng inter-agency rito Lunes, sinabi ni Dr. Paula Paz Sydiongco, katulong na punong pampurok ng Kagawaran ng Kalusugan dito, na ang mga nars ay maglilingkod sa WHO sa loob ng 10 araw. ‘Sinimulan na ng WHO na pauwiin ang kanilang mga nars kaya kailangan nila ang mga boluntaryong nars buhat sa ating bayan,” paliwanag ni Dr. Sydiongco. Bawa’t boluntaryong nars ay tatanggap ng tig-P1,500 sa paglilingkod na gagawin nila. Miyerkoles ang huling araw na itinakda sa paghaharap ng aplikasyon at inaasahang Huwebes naman sila magsisimula ng pagtatrabaho pagkatapos ng orientation nila. Ang mga aplikante ay maaaring makipag-ugnayan kay Maricel Castro, tagapag-ugnay ng WHO, sa 0947-889-9177. PND (jb/zaf) |
| |
| Tinanggap ng Pangulong Aquino ang anim na bagong embahador |
| |
| Tinanggap ng Pangulong Benigno S. Aquino III Lunes ang anim na bagong embahador sa Pilipinas. Sa simpleng seremonya sa Palasyo ng Malacanang ay iniharap ng anim na embahador ang katibayan ng pagiging sugo ng kanilang mga bansa sa Pilipinas. Kaharap sa pagtanggap ng Pangulo ng katibayan ng mga bagong embahador si Kalihim Albert del Rosario ng Ugnayang Panlabas. Ang mga nagharap ng katibayan nila sa Pangulo ay ang mga sumusunod: Austria: Josef Muellner, Ambassador Extraordinary and Plenipotentiary Belgium: Ronald Van Remoortele, Ambassador Extraordinary and Plenipotentiary Myanmar: U Ye Myint Aung, Ambassador Extraordinary and Plenipotentiary Vietnam: Truong Trieu Duong, Ambassador Extraordinary and Plenipotentiary Canada: Neil Reeder, Ambassador Extraordinary and Plenipotentiary United States: Philip Goldberg, Ambassador Extraordinary and Plenipotentiary. PND (jl/zaf) |
| |
| Idineklara ng Pangulong Aquino na pista opisyal ang Disyembre 5 na ika-48 taon ng pagkatatag ng Lungsod ng Palayan sa Nueva Ecija |
| |
| Idineklara ng Pangulong Benigno S. Aquino III ang Disyembre 5, natapat sa araw ng Huwebes, bilang pista opisyal sa Lungsod ng Palayan sa lalawigan ng Nuweba Esiha upang ipagdiwang ang ika-48 taon ng pagkatatag ng nasabing lungsod. Ang deklarasyon ay inilagda ng Pangulo sa pamamagitan ng Proklamasyon Blg. 687 na nilagdaan ni Kalihim Tagapagpaganap Paquito N. Ochoa, Jr. noong Nobyembre 20 upang bigyan nang lubos na pagkakataon ang mga mamamayan ng Palayan na ipagdiwang nang angkop ang araw ng pagiging lungsod ng kanilang bayan. Hunyo 15, 1965 nang pagtibayin ng Kongreso ng Pilipinas ang Batas ng Republika Blg. 4475 na lumikha ng Lungsod ng Palayan bilang bagong ulung-lungsod ng Nueva Ecija. Ang pamahalaang Lungsod ng Palayan ay nabuo noong Disyembre 5, 1965 sa ilalim ng noon ay Gobernador Eduardo L. Joson bilang Ex-Officio Mayor, samantalang ang mga bokal naman ng lalawigan noon ang naging unang Sangguniang Lungsod. PND (js/zaf) |
| |
| Tatanggap pa rin ng tulong ang ‘vulnerable families’— DSWD |
| |
| (LUNGSOD NG TACLOBAN, Leyte—Patuloy na tatanggap ng relief goods ang mga vulnerable families kahit lampas na ang Disyembre 31, 2013, alinsunod sa paglilinaw na ginawa Lunes ng Kagawaran ng Kagalingang Panlipunan at Kaunlaran (DSWD). Inilaas ni Vilma Cheche Cabrera, Katulong na Kalihim ng DSWD, sa pulong ng inter-agency dito sa liwanag ng mga ulat na titigilan na ng pamahalaan ang pagbibigay ng relief goods sa mga biktima ng bagyong "Yolanda" pagkatapos ng Disyembre 2013. “Ibig kong liwanaging itutuloy pa rin ng pamahalaan ang pamimigay ng tulong sa mga biktima ng bagyo,” sabi ni Cabrera. Ang ibang tulong ay ang mga programang cash-for-work at food-for-work na inilunsad ng DSWD upang tulungan ang mga nakaligtas sa hagupit ni Yolanda na makatayo sa sarili nilang mga paa. Ang mga pamilyang may anak na nasa wastong gulang at may kakayahan ay palalahukin sa dalawang programang ito at hindi na bibigyan ng relief goods. Tanging ang mga pamilyang kasama sa highly vulnerable na ang ibig sabihin ay may mga anak na paslit, nakatatandang mamamayan (senior citizens) at mga taong may kapansanan ang tutulungan pa ng DSWD. “Para sa mga may kakayahang sumali sa alinman sa cash-for-work o food-for-work, bibigyan sila ng gawain na ang suweldo ay manggagaling sa DSWD,” dagdag ni Cabrera. Sinabi ni Cabrera na sa 526,289 apektadong populasyon, patuloy pang pinagkakalooban ng DSWD ng pangunahing pangangailangan ang 273,782 vulnerable families. Hanggang Nobyembre 30, nakapagbigay na ang DSWD ng kabuuang 2,322,051 food packs sa mga nasalanta ng bagyong Yolanda. Disyembre 1 ay nagbigay pa rin ang DSWD ng 42,191 food packs. Bukod dito, ang DSWD ay nakapagpamigay rin ng 294,314 litro ng tubig at 244,444 high-energy biscuits. PND (jb/zaf) |
| |
| Tiniyak ng bagong Embahador ng Estados Unidos ang patuloy na suporta sa Pilipinas |
| |
| Tiniyak ng bagong Embahador ng Estados Unidos sa Pilipinas ang patuloy na suporta ng Estados Unidos sa Pilipinas upang makabangon sa matinding pinsalang idinulot ng napakalakas na bagyong "Yolanda." Iniharap ni Embahador na Katangi-tangi at May Lubos na Kapangyarihan ng Estados Unidos Philip Goldberg sa Pangulong Benigno S. Aquino III ang kredensiyal niya Lunes. Sinabi ni Goldberg na kung bagaman nabawasan ang mga tauhang militar nila sa bansa, nananatili ang mga sibilyang tauhan nila sa Pilipinas. “Nagkaroon ako ng pagkakataong sabihin sa Pangulong Aquino na ang Estados Unidos ay mamamalaging kabalikat ng Pilipinas sa panahon ng pagtulong hanggang sa rekostruksiyon. Aagapayanan ng Estados Unidos ang Pilipinas, lalo na sa mga pook na kailangang-kailangan ang rehabilitasyon at rekostruksiyon,” wika pa ng bagong Embahador ng Estados Unidos. Idinugtong niya na ‘laging kaisa’ ang Estados Unidos sa una pa lamang paghahatid ng tulong sa mga nasalanta dahil sa pambihira nitong kakayahan. “Subali’t ang aming pagsisikap na sibilyan ay magpapatuloy kahit mabawasan ang mga tauhan ng militar,” dugtong pa ni Goldberg. Sinabi ng Embahador na nasaksihan niya ang lawak ng pinsala nang dalawin niya ang ilang pook na sinalanta ng bagyo, lalo na ang Lungsod ng Tacloban at ang bayan ng Palo sa Leyte noong nakaraang linggo. Binanggit ni Goldberg ang ugnayang tao-sa-tao ng Pilipinas at Estados Unidos na sumasagisag sa magandang samahan ng dalawang bansa. Nangako rin siya na sisikapin sa hinaharap “ang lubusang pagtutulungan para sa kasaganaan at ukol sa kapanatagan sa reyhiyong ito, gayundin sa buong daigdig dahil ito ay nakasalalay sa magandang samahan at unawaan ng tao-sa-tao.” Ayon kay Goldberg, ang Estados Unidos ay makikipagtulungan sa Pilipinas, hindi lamang sa kapanatagan, kundi para rin sa humanitarian assistance and disaster relief. Sinabi rin ni Goldberg na bilang embahador sa Pilipinas, sisikapin niyang “lalo pang lumawak at mag-ibayo ang tunay nang napakagandang samahan, mainam na ugnayan, makasaysayang pagsasama sa larangan ng ekonomya at kalakalan, kapanatagan at mabuting pagtitinginan ng dalawang lahi.” “Ibig naming pag-ibayuhin pa ang pagsisikap upang sa gayon ay makatulong na lalo pang gumanda ang samahan habang patungo tayo sa framework agreement upang ang Estados Unidos at ang Pilipinas ay lalong gumanda ang samahan,” wika pa ng Embahador. PND (jl/zaf) |
| |
| Inulit ng Estados Unidos ang suporta sa 'code of conduct' sa rehiyong Asyano |
| |
| Inulit ng Estados Unidos Lunes ang suporta nito sa code of conduct na titiyak sa malayang nabigasyon sa rehiyon ng Timog Silangang Asya. Sinabi ng bagong Embahador Philip Goldberg ng Estados Unidos sa Pilipinas na bagaman walang pinapanigan ang Amerika sa sigalot sa rehiyon, ang Code of Conduct na ito ay magpapahupa ng tensiyon sa pook na ito. ‘Wala kaming kinakampihan at hindi kami bansang umaangkin ng alinman sa mga teritoryo rito. Subali’t, sinusuportahan naming mabuti ang mga bansa ng rehiyon na nagsama-sama sa lilim ng isang Code of Conduct na makatutulong upang mabalangkas ang mga tuntuning sa daan o tuntunin sa karagatan sapagka’t mababawasan ang tensiyon dahil dito,” wika pa ni Goldberg sa pulong-balitaan pagkatapos niyang iharap sa Pangulong Benigno S. Aquino III ang katibayan ng pagiging Embahador niya ng Estados Unidos. Idinugtong pa niya na iyan din ang katotohanan “sa alinmang legal na paraang ginawa ng pamahalaang Pilipino.” Ayon kay Goldberg, nagpahayag ang Estados Unidos ng pagkabahala sa tuwiran at maging sa pamamagitan ng media na ginawa ng Tsina kaugnay ng deklarasyon ng Tsina sa isang air defense identification zone. “Ang hakbang na ito ay hindi magiging daan ng pagtitiwala at sa halip pa nga, malamang na maging dahilan ito ng tensiyon,” sabi pa ni Goldberg. “Naniniwala kami sa malayang nabigasyon maging sa himpapawid o sa karagatan. Ito ang paninindigan ng Estados Unidos at patuloy naming isusulong ang pananalig na ito, at susuportahan namin ang mapayapa, legal at diplomatikong pagsisikap na malutas nang maayos ang tensiyon,” wika pa ni Embahador Goldberg. PND (jl/zaf) |
| |
| Walang pulitika sa paghirang kay Lacson bilang 'reconstruction czar' |
| |
| Walang bahid ng pulitika ang pagkahirang kay dating Senador Panfilo Lacson bilang reconstruction czar sa mga pook na malubhang sinalanta ng napakalakas na bagyong "Yolanda." “Ang pangunahing pakay ng pagtatalaga kay Lacson ay makabangon agad sa lalong madaling panahon ang mga iwinasak ng bagyo,” sabi ng Tagapagsalita ng Pangulo Edwin Lacierda sa pulong balitaan Lunes ng hapon sa Malacanang. ‘Palagay ko, ang tunay na pakay ng rekostruksiyon ay upang makabangon agad ang mga napinsalang mga bayan at lungsod. Walang isyu rito, walang halong pulitika ito. Gagawin ang lahat para maiangat uli ang kabuhayan at katayuhan ng mga naapektuhang lugar,” dagdag pa ni Lacierda. Noong Linggo ng gabi, tinanggap ni Lacson ang alok ng Pangulong Benigno S. Aquino III na pamunuan ang pagsisikap na gagawin para maayos agad ang mga pook na sinalanta ng bagyong Yolanda na Kabisayaan at Timog Luzon at nag-iwan ng may 5,600 patay at mahigit na P30 bilyong pinsala sa ari-arian. Sinabi ni Lacierda na kailangan ng Palasyo ang isang mangangasiwa nang puspusan sa gagawing rekostruksiyon ng malawak na pinsala ng bagyo. “Kailangan natin ang totohanan at puspusang mangangasiwa sa rekostruksiyon. Sa katayuan niya at dahil naging senador pa, alam niya kung paano haharapin ang iba-ibang maaring maging hadlang sa gagawing rekostruksiyon,” wika ni Lacierda. Sa kabilang dako, sinabi ni Lacierda na walang inaasahang malaking pagbabago sa gawain ng Gabinete kaugnay ng gagawing rehabilitasyon sa mga nasalantang pook. Idinugtong niyang ang Kagawaran ng Enerhiya ang bahala sa panunumbalik ng koryente sa mga pook na nasalanta, at ang Kagawaran ng Interyor at Lokal na Pamahalaan ang mangangasiwa sa lokal na pamahalaan at sa pulisya. Bahala naman ang Kagawaran ng Kagalingang Panlipunan at Kaunlaran sa serbisyong tulad ng stress debriefing at pagbibigay ng tulong sa mga biktima ng bagyo. “Walang pagbabago sa kalagayan. Ang totoo, ito ang dahilan kaya tayo mayroong rehabilitation czar upang ang mga kagawad ng Gabinete ay makapagbuhos ng panahon sa pagsasagawa ng kanilang mga tungkulin,” pahayag pa ni Lacierda. PND (jl/zaf) |
| |
| May higit na impluwensiya ngayon ang Pilipinas sa 'global program’ ng 'International Maritime Organization,' sabi ng Malacanang |
| |
| Nagalak ang Pilipinas sa pagbibigay ng International Maritime Organization (IMO) nang higit na impluwensiya sa pagpapakilos ng pandaigdig na programa ng kapisanan. Sa pulong balitaan sa Malacanang Lunes, sinabi ng Tagapagsalita ng Pangulo Edwin Lacierda na makikinabang nang malaki sa pangyayaring ito ang mga magdaragat na Pilipino. “Karangalan ito ng Pilipinas. Tayo ay isa sa 40 nahalal na kasaping bansa buhat sa kabuuang 170 bansang kasapi humigit-kumulang,” wika ni Lacierda. “Ang mga magdaragat na Pilipino ay 30 bahagdan ng kabuuang pandaigdig na magdaragat o halos 400,000 ang mga Pilipinong magdaragat,” dugtong ni Lacierda. “Ano mang patakarang itatakda ng Sanggunian ng IMO, malaki ang epekto nito sa Pilipinas,” dagdag ni Lacierda. Ang IMO ay ahensiya ng Bansang Magkakaanib na may sagutin sa kaligtasan at kapanatagan ng pagbabapor at pag-iwas sa polusyong dulot ng mga bapor. Ang samahang ito rin ang naghahanda at nagpapatupad ng mga pamantayan sa pandaigdig na kaligtasan ng pagbabapor, pangangalaga sa marine environment at pagtatakda ng mga kuwalipikasyon ng mga magdaragat. PND (as/zaf) |
| |
| Itinalaga ng Pangulong Aquino si dating Senador Lacson bilang 'rehabilitation czar' ng bagyong 'Yolanda' |
| |
| Itinalaga ng Pangulong Benigno S. Aquino III si dating Senador Panfilo Lacson bilang “rehabilitation czar” o taong mangangasiwa sa gagawing puspusan at pangkalahatang pagsisikap ng pamahalaang pamansa upang maayos at magawa ang lahat ng iwinasak ng napakalakas na bagyong "Yolanda" sa Kabisayaan. Sinabi ni Presidential Communications Operations Office Secretary Herminio Coloma Jr. sa isang text message na pinasalamatan ng Pangulong Aquino ang mambabatas sa pagtanggap ng anyaya sa kanyang pamunuan ang pangangasiwa sa rehabilitasyon at rekostruksiyon ng mga pook na malubhang sinalanta ng bagyong Yolanda. “Ang kabuuan ng magiging tungkulin at pananagutan niya ay ilalagay sa isang Kautusang Tagapagpaganap na ilalabas sa madaling panahon,” sabi ni Kalihim Coloma. Sa panayam sa himpilang dzRB Radyo ng Bayan noong Linggo, sinabi ni Coloma na may kakayahan si Lacson upang balikatin ang gawaing ito dahil sa rekord bilang pinunong bayan na tulad ng pagiging direktor heneral ng Pambansang Pulisya at dalawang terminong pagiging Senador. Ipinaliwanag naman ng Tagapagsalita ng Pangulo Edwin Lacierda na ang pagtatalaga kay Lacson sa tungkuling ito ay dahil sa lawak ng pinsala at sa malawakang pagbabagong tatag na gagawin. “Minarapat ng Pangulo na magtalaga ng isang taong ibubuhos ang lahat ng panahon sa gagawing rekostruksiyon. Kaya minabuti niyang ang piliin ay hindi kagawad ng Gabinete na may kanya-kanyang trabahong puspusang ginagampanan. Dahil dito, si Senador Lacson ang inalok niyang maging rehabilitation czar,” sabi ni Lacierda sa mga reporter. PND (hdc/zaf) |
No comments:
Post a Comment